Presidenti Donald Trump, në një bisedë telefonike me “The New York Times”, operacionin amerikan në Venezuelë e quajti “brilant” por nuk tha nëse për këtë çështje e ka konsultuar Kongresin.

Trumpi, sipas NYT, u duk i lodhur.

Gazeta thotë se e ka telefonuar Trumpin pak minuta pasi ky njoftoi për kapjen e Nicolas Maduros.

“Shumë planifikime të mira dhe shumë, shumë ushtarë e njerëz të mirë”, tha ai. “Ishte një operacion brilant, vërtetë”.

Gazetari i NYT thotë se e ka pyetur nëse ka kërkuar autoritetin e Kongresit para se ushtria amerikane, bashkë me personel të zbatimit të ligjit, u përfshinë në “sulm në shkallë të gjerë”, siç shkroi ai në rrjete sociale.

“Do ta diskutojmë atë”, tha ai. “Do ta mbajmë një konferencë për media”.

Tyler Pager thotë se e pyeti se çka parasheh për të ardhmen e Venezuelës.

“Do të mësoni gjithçka për këtë në orën 11 (sipas kohës lokale)”, tha ai, para se ta mbyllte telefonin.

Telefonata zgjati 50 sekonda.